सदगुरुनगर भोसरी येथे पाण्याची टाकी कोसळून ४ कामगारांचा मृत्यू

• सकाळी ७ च्या दरम्यान लेबर कॅम्पवर कोसळली टाकी

• पाण्याच्या टाकीचे निकृष्ट काम असल्याचा परिसरातील नागरिकांचा आरोप

लोकमान्य टाइम्स : भोसरी

सदगुरुनगर, भोसरी येथे मोठी दुर्घटना घडली असून पाण्याची टाकी कोसळून ४ कामगारांचा दुर्दैवी मृत्यू झाल्याचा प्राथमिक अंदाज आहे. पाण्याची टाकी कोसळल्याने त्या साहित्याच्या ढिगाऱ्याखाली अनेकजण अडकल्याची भीती व्यक्त करण्यात येत आहे. तर जे जखमी झाले आहेत त्यांच्यावर रुग्णालयात उपचार करण्यात येत आहेत.

येथे उभी करण्यात आली होती पाण्याची टाकी

सध्या या ठिकाणी रेस्क्यू ऑपरेशन सुरु करण्यात आले आहे. सध्या अग्निशमन दलाचे कर्मचारी आणि पोलीस घटनास्थळी दाखल झाले आहेत.
मिळालेल्या माहितीनुसार, भोसरीच्या सदगुरु नगर या ठिकाणी असलेली एक पाण्याची टाकी कोसळली. या ठिकाणी लेबर कॅम्पमधील काही कामगार राहत होते. बिल्डरने तकलादू पद्धतीने ही पाण्याची टाकी उभारली होती, असा आरोपही नागरिकांनी केला आहे. आज सकाळी साधारण ७ च्या दरम्यान ही पाण्याची टाकी कोसळून मोठी दुर्घटना घडली.

ढिगाऱ्याखाली अनेकजण अडकल्याची भीती

या टाकीच्या ढिगाऱ्याखाली अनेकजण अडकल्याची प्राथमिक माहिती समोर येत आहे. तर काही कामगार जखमी झाले आहेत. या दुर्घटनेची माहिती मिळताच पिंपरी चिंचवडमधील अग्निशमन दल आणि पोलीस घटनास्थळी दाखल झाले आहेत. सध्या हा ढिगारा हटवून जखमींना बाहेर काढले जात आहे. तसेच सध्या जखमींना रुग्णालयात दाखल केले जात आहे. पण या दुर्घटनेत मृत्यू झालेल्या कामगारांचे मृतदेह काढण्यास नातेवाईकांडून विरोध दर्शवला जात आहे.

शहरातील कामगारांचे , मजुरांचे कैवारी, कामगार नेते कोठे आहेत गायब ?

पिंपरी चिंचवड ही औद्यगिकनगरी आहे. आणि भोसरी ही कामगारनगरी म्हणून ओळखली जाते. असंघटित कामगार, मजूर यांना न्याय देण्यासाठी शेकडो संघटना या शहरात काम करतात. परंतु सद्या कामगारांचे मजुरांचे नेते म्हणून मिरविण्यात धन्यता मानणारे हेच नेते आता का गप्प आहेत असा प्रश्न उपस्थित होत आहेत. का ते कामगार महाराष्ट्राच्या बाहेरचे आहेत म्हणून गप्प आहेत का ? का हे नेते निवडणुकांमध्ये व्यस्त असल्याने कामगार, मजुरांच्या प्रश्नाकडे लक्ष देण्यास त्यांना वेळ नाही असा प्रश्न ही कामगार, मजूर व्यक्त करताना दिसत आहेत.