२६४ नगरपरिषद आणि नगर पंचायत अध्यक्षपदासाठी आज मतदान

• १२ हजार ३१६ मतदान केंद्रावर होणार मतदान

• बुधवारी मतमोजणी ; कौल कोणाच्या बाजूने?

लोकमान्य टाइम्स : संजय शिंदे

गेल्या अनेक वर्षांपासून प्रलंबित असलेल्या महाराष्ट्रातील नगरपालिका निवडणुकीसाठी आज (मंगळवार दिनांक ०२) मतदान होणार आहे. राज्यातील २६४ नगरपरिषदा व नगरपंचायतींच्या सार्वत्रिक निवडणुकांचा त्यामध्ये समावेश आहे. एकूण १२ हजार ३१६ मतदान केंद्रावर मतदान होणार आहे. त्यासाठी पोलिसांमार्फत पुरेशा बंदोबस्ताचीदेखील व्यवस्था करण्यात आली आहे.

नगरपरिषदा व नगरपंचायतींच्या २६४ अध्यक्षपदांच्या आणि ६ हजार ४२ सदस्यपदांच्या जागांसाठी उद्या मतदान होईल. संपूर्ण निवडणूक प्रकियेसाठी पुरेशा मतदान यंत्रांची (EVM) व्यवस्था करण्यात आली आहे. त्यात एकूण १७ हजार ३६७ कंट्रोल युनिट; तर ३४ हजार ७३४ बॅलेट युनिटचा समावेश आहे. अधिकारी/ कर्मचाऱ्यांचा समावेश असलेली मतदान पथके मतदान केंद्रावर सुरळित पोहचली आहेत. उद्या सकाळी ७:३० वाजता मतदानास सुरुवात होईल. सांयकाळी ५:३० पर्यंत मतदानाची वेळ असेल.

राज्य निवडणूक आयोगाने ४ नोव्हेंबर २०२५ रोजी राज्यातील २४६ नगरपरिषदा आणि ४२ नगरपंचायतींच्या (एकूण २८८) सार्वत्रिक निवडणुकांचा कार्यक्रम जाहीर केला होता. आता निवडणूक निर्णय अधिकाऱ्यांच्या निर्णयाविरुद्ध अपील असलेल्या प्रकरणांचा निर्णय २३ नोव्हेंबर २०२५ रोजी किंवा त्यानंतर आल्याने २४ नगरपरिषदा व नगरपंचायतींच्या अध्यक्षपदाच्या आणि सदस्यपदांच्या निवडणुकांसाठी उद्या मतदान होणार नाही.

२४ नगरपालिका व नगरपंचायत साठी २० डिसेंबर ला मतदान

तेथे सुधारित कार्यक्रमानुसार २० डिसेंबर २०२५ रोजी मतदान होणार आहे. त्यामुळे आता उर्वरित २६४ नगरपरिषदा व नगरपंचायतींच्या निवडणुकांसाठी उद्या मतदान होईल. त्यातील ७६ नगरपरिषदा व नगरपंचायतींमधील न्यायालयीन प्रकरणांमुळे बाधित १५४ जागांसाठीदेखील मतदान होणार नाही. तिथेही सुधारित निवडणूक कार्यक्रमानुसार संबंधित बाधित जागांसाठी २० डिसेंबर २०२५ रोजी मतदान होईल.

बुधवारी मतमोजणी ?

राज्यातील नगरपालिका आणि नगरपंचायत निवडणुकीसाठी विविध राजकीय पक्षांकडून जोरदार प्रचार करण्यात आला. प्रचाराची मुदत यावेळी निवडणूक आयोगानं १ डिसेंबर रोजी रात्री १० वाजेपर्यंत वाढवली होती. आता आज नगरपरिषदा व नगरपंचायतींच्या २६४ अध्यक्षपदांच्या आणि ६ हजार ४२ सदस्यपदांच्या निवडणुकीसाठी मतदार कोणाच्या पारड्यात कौल देतात हे पाहावं लागेल. ०२ डिसेंबरला मतदान पार पडल्यानंतर या ठिकाणी ०३ डिसेंबरला मत मोजणी होणार आहे.

२० डिसेंबर ला होणाऱ्या नगरपालिका आणि नगरपंचायत ची नावे पुढील प्रमाणे : ठाणे- अंबरनाथ. अहिल्यानगर- कोपरगाव, देवळालीप्रवरा, पाथर्डी व नेवासा. पुणे– बारामती व फुरसुंगी- उरुळी देवाची. सोलापूर- अनगर व मंगळवेढा. सातारा– महाबळेश्वर व फलटण. छत्रपती संभाजीनगर– फुलंब्री. नांदेड- मुखेड व धर्माबाद. लातूर– निलंगा व रेणापूर. हिंगोली– बसमत. अमरावती– अनंजनगाव सूर्जी. अकोला– बाळापूर. यवतमाळ– यवतमाळ. वाशीम– वाशीम. बुलढाणा– देऊळगावराजा. वर्धा- देवळी. चंद्रपूर- घुग्घूस.