महापालिका निवडणुकीच्या तोंडावर मविआ व मनसे एकत्रतेचा ठाणे पॅटर्न
- शिवसेना (उबाठा ), राष्ट्रवादी (शप ), काँग्रेस,मनसेच्या एकत्रित बैठका
- ठाण्यासह, उर्वरित महाराष्ट्रात ही ठाणे पॅटर्न राबविण्याचे संकेत ; वरिष्ठ नेत्यांच्या निर्णयाकडे कार्यकर्त्यांचे लक्ष
लोकमान्य टाइम्स : संजय शिंदे
महाराष्ट्रात स्थानिक स्वराज्य संस्थाच्या निवडणुकीचे पडघम वाजले आहे. राज्यात सत्तेत असणाऱ्या महायुतीतील घटक पक्ष मुंबई वगळता उर्वरित महाराष्ट्रात स्वतंत्र निवडणुका लढण्याचे संकेत मिळत आहेत; मात्र त्यांच्या विरोधात महाविकास आघाडी व मनसे पक्षाने एकत्रित निवडणूक लढण्यासाठी प्रयत्न सुरु केले आहेत. मुंबई मध्ये उद्धव ठाकरे आणि राज ठाकरे हे एकत्रित निवडणुका लढाणार असा राजकीय वर्तुळात चर्चा आहे. दोन्ही ठाकरे बंधुच्या एकत्रितला काँग्रेस आणि राष्ट्रवादी (श प) विरोध करतील असा अंदाज व्यक्त केला जात होता. मात्र, ठाण्यामध्ये या चर्चेला खोटे ठरवित महाविकास आघाडी आणि मनसे च्या पदाधिकाऱ्यांनी एकत्रित चर्चा केल्याने या ठाणे पॅटर्नची जोरदार चर्चा आहे.
जितेंद्र आव्हाड, राजन विचारे, अविनाश जाधव, विक्रांत चव्हाण यांची एकत्रित बैठक
मुंबई व ठाणे महानगरपालिका निवडणुकीसह आगामी स्थानिक संस्थांच्या निवडणुकांसाठी राज ठाकरे (मनसे) व उद्धव ठाकरे (शिवसेना – उबाठा) हे एकत्र येणार असल्याच्या चर्चा गेल्या काही दिवसांपासून राजकीय वर्तुळात ऐकायला मिळत आहेत. मराठीच्या मुद्यावर हे दोघे भाऊ अलीकडेच एकत्र आल्याचं पाहायला मिळालं. मात्र, राजकारणाच्या मैदानात एकत्र येण्याबाबत अद्याप कोणतीही स्पष्टता नाही. दोन्ही पक्षांचे नेते शिवसेना (उबाठा) व मनसे एकत्र येण्याबाबत संकेत देत आहेत. खासदार संजय राऊत व मनसे नेते संदीप देशपांडे यामध्ये आघाडीवर आहेत.
दरम्यान, उद्धव ठाकरे व राज ठाकरेंचे पक्ष एकत्र आले तर महाविकास आघाडीत काँग्रेस व राष्ट्रवादी काँग्रेस त्यास विरोध करेल असं बोललं जात होतं. मात्र, खासदार सुप्रिया सुळे यांनी अलीकडेच स्पष्ट केलं की असा विरोध करण्याचं कारणच नाही. तर, काँग्रेसने यावर मौन बाळगलं होतं. अशातच ठाण्यामध्ये महायुतीविरोधात महाविकास आघाडी व मनसे एकत्र येणार असल्याची चर्चा सुरू झाली आहे. राष्ट्रवादी काँग्रेस पार्टी शरदचंद्र पवार या पक्षाचे आमदार जितेंद्र आव्हाड यांनी यासंदर्भात एक सूचक पोस्ट केली आहे.आव्हाड यांच्या निवासस्थानी महाविकास आघाडी व मनसे नेत्यांमध्ये महत्त्वाची बैठक नुकतीच पार पडली. आव्हाड यांनी या बैठकीचा व्हिडीओ इन्स्टाग्रामवर शेअर केला आहे. या बैठकीला आव्हाड यांच्यासह शिवसेनेचे (उबाठा) माजी खासदार राजन विचारे, मनसेचे ठाणे जिल्हाध्यक्ष अविनाश जाधव आणि काँग्रेसचे जिल्हाध्यक्ष विक्रांत चव्हाण उपस्थित होते
आगामी स्थानिक स्वराज्य संस्थांच्या निवडणुकीआधी महायुतीविरोधात मनसे व महाविकास आघाडी एकत्र येण्याचं हे पहिलंच पाऊल आहे. या चार नेत्यांमध्ये आगामी निवडणुकीबाबत चर्चा झाली की ठाण्यात मोठ्या आंदोलन उभं करण्याच्या हालचाली चालू आहेत याबाबत अद्याप साशंकता आहे. पुढच्या काही दिवसांमध्ये या भेटीचं खरं कारण समोर येईल. दरम्यान, या भेटीमुळे भाजपा व शिवसेनेची (शिंदे) चिंता वाढल्याची चर्चा आहे. ठाण्यात मनसे समर्थकांची, कार्यकर्त्यांची व त्यांच्या मतदारांची मोठी संख्या आहे. महाविकास आघाडीला मनसेचं बळ मिळालं तर एकनाथ शिंदे यांच्या पक्षाला व भाजपाला मोठा फटका बसू शकतो.
