स्थानिक स्वराज्य संस्था निवडणुकीच्या तोंडावर शरदचंद्र पवार राष्ट्रवादी काँग्रेस पक्षाला मोठा दिलासा ; पिपाणी चिन्ह निवडणुकीच्या यादीतून वगळले

• लोकसभेची एक आणि विधानसभेच्या १९ जागेवर बसला होता फटका

• मुक्त चिन्हाच्या यादीतून पिपाणी चा पत्ता कट

लोकमान्य टाइम्स : संजय शिंदे

लोकसभेत १ तर विधानसभा निवडणुकीत १९ ठिकाणी पक्षाच्या उमेदवारांना तुतारी चिन्हाला साधर्म्य असणाऱ्या पिपाणी चिन्हामुळे फटका बसला होता. त्याबाबत निवडणूक आयोगाकडे हे चिन्ह वागळण्यात यावे अशी विनंती करण्यात आली होती. या विनंतीचा विचार करून मुक्त चिन्ह यादीतून पिपाणी हे चिन्ह वगळण्याचा निर्णय निवडणूक आयोगाने घेतला असल्याने राष्ट्रवादी शरद पवार गटाला दिलासा मिळाला आहे.

शिवसेना आणि राष्ट्रवादी काँग्रेस पक्षाच्या फुटीनंतर आमदार अपात्रता आणि निवडणूक चिन्हाचा खटला अजून ही सुप्रीम कोर्टात सुरु आहे. निवडणूक चिन्हावरील सुनावणी सुरु असताना दुसरीकडे निवडणूक आयोगाने शरद पवार गटाला मोठा दिलासा दिला आहे. लोकसभेची एक आणि विधानसभा निवडणुकीत १९ जागा गमावल्यानंतर आता स्थानिक स्वराज्य संस्थांच्या निवडणुकीत राष्ट्रवादी पवार गटाला गुड न्यूज मिळाली आहे.

राष्ट्रवादी काँग्रेस शरद पवार गटाने या संदर्भात निवडणूक आयोगाकडे वारंवार तक्रार केली होती. मात्र सुरवातीला आयोगाकडून कोणताही प्रतिसाद मिळाला नव्हता. अखेर स्थानिक स्वराज्य संस्थांच्या आगामी निवडणुकांच्या पार्श्वभूमीवर आयोगाने हा निर्णय घेतला असून १९४ मुक्त चिन्हाच्या यादीतून पिपाणी चे नाव कायमचे वगळले आहे. मागील लोकसभा आणि विधानसभा निवडणुकीमध्ये पिपाणी चिन्हावर अपक्ष उमेदवारांना मोठ्या प्रमाणावर मते मिळाल्याचे चित्र होते. विशेषतः शिरूर, बारामती, सातारा, भिवंडी, दिंडोरी, रावेर, अहमदनगर, बीड आदी मतदारसंघात या चिन्हाला चांगला प्रतिसाद मिळाला होता. सातारा लोकसभेची जागा पवार गटाला पिपाणी चिन्हामुळे थोडक्यात गमवावी लागली होती.